Kenangan Membanting Padi Pada Zaman Dahulu Di Kelantan

---

 
Sapo sini beso mukul padi? Kecek mudoh gak, hok beso terlibat dengan khijoan penanaman padi. X kiro lah mukul ko, cedung ko, punggah anok semai kok atas batas ko, bowok kheto galo ko, bowok mesin ngetey sekalipun.

Tapi penanaman padi loni pun, mengalami evolusi doh dari semasa ko semasa. Meracun pun paka drone doh. Jauh lah bezo dengan caro penanaman padi orey zamey ritu. Kalu zamey 50, 60 tahun dulu, zamey muloh Che Wo kito, zamey2 tokong2 x berapo nok tonggek lagi, taney padi pun sekali setahun jah. Taney padi tugal. Harap ko air hujey semato2. Kemudian tu baru lah timbul tali2 air.
Zamey sebelum ado tali air gak, nok buleh ko jadi beras sebutir, bercincin dulu anok mato. Dulu2 x dok lagi mukul paka kedak ni. Demo dulu2 ngiirik daley beluley lembu, x pun daley tikar kuey. Pah jemur pulok dulu. Kemudian pulok keno kisar dulu. Sudoh kisar baru lah buleh tumbuk guno lesung hindik x pun lesung tangey. Tu x kiro lagi nok keno tampi ko apo dulu.

Kito tolok tepi dulu kaedah penanaman padi zamey Che Wo kito. Kito caro bab hok kemudian doh sikit. Zamey mukul padi. Sebab loni nok tengok orey mukul padi pun payoh doh nok jupo. Rasanya kalu jajak round daley 7 butir kampung, adat kecek tujuh2 butir kampung pun x jupo orey duk mmukul.

Daley banyok2 musim padi, musim mukul lah paling ramai orey kampung duk nanti2. X kiro lah orey tu wat (taney) padi ko dop, pasal musim ni, musim paling meriah sekali. Kedak padi hok duk sekung bowoh rumoh jadi sakok aye duk telur, wat tubik usung tengoh padey. Bezo dulu2, demo x nanti ko siey hari jah mukul, kadey2 time maley pun demo mukul lagi. Bowok lapu gasolin sebutir. Molek2 duk mukul tengoh maley.

Hok duk mukul, caro ko duk mukul, hok duk neboh belaley caro ko neboh belaley, hok duk gagar ikey caro ko duk gagar ikey daley lopok. Loni nok tengok orey gagar ikey daley baruh pun payoh doh rasanya. So tu, pasal loni kalu time orey mesin padi, relung padi pun kering ketoh. Nok jupo lopok air pun payah. Pah so lagi, ikey pun jadi macey mapuh bako. X bui mapuh bako kok mano gak, lagu ko duk tuba, duk ngarey, pah tu atas padi sajo pun berapo jenis racun duk guno.



Style masyarakat kampung dulu2, kalu ado khijo buat apo, demo style makey pinjamey. Keroh orey kampung pakat gilir buat. Sudoh mukul, pakat duk makey atas batas padi. Klu kato suko dulu2 pun, memey yolo lah suko dulu2. Pasal kito nok jupo suasana gini lagi, pelawok kecek gak, x jupo doh. Sudoh mukul kutip padi bubuh daley baloh. Sesetengah tempat demo panggil tepah padi. Daley baloh padi, padi x berhabisan . Padi x pun beras usey, demo cedey kisar wat tepung apey. Orey2 dulu, sudoh mukul cabut zakat selaluh. Buleh 4, 5 guni, gundal so guni bahagiey zakat.
Bezo sebenarnya mukul caro tradisional dengan mukul paka mesin ngetey serupo hari ni. Mukul caro tradisional ni, demo pukul bilo padi time betul2 masok. Lagu butir padi kuning duk luyut baru kutip kerat pukul. Kalu paka mesin, cepat memey cepat, tapi masalahnya padi x dey masok molek pun kutip gomo doh. So tu kes ngetey padi nok hambak trip. So lagi kes padi tu masok x sekato. Keno lambat start nabur gak, lambat lah padi nok masok. Sebab tu beras dulu2 payoh nok basi, hancur pun payoh. Loni bukey nok kato, taney padi sendiri, makey beras orey.


Sekalo lepas mukul, orey kampung hok wat (taney) padi, ajok selaluh makey beras baru. Nok balik , hulur pulok buleh segenggam duo wat try nanok rumoh.

Hok paling sedap sekali, kalu lepas jah musim mukul, ado selaluh doh mainey. X kiro lah main wau ko gapo. Kalu budok2 gak, ko duk main nusuk daley jerami. Sebeloh maley gak, dikir barat, woye kulit rapat pah pagi. Maley esok mari sambung pulok kesudahan cerito woye kulit ni.
Time ni jugok lah timbul woye gambar public lesen. Pakat kutip habis sebutir rumoh tengok woye gambar public lesen, bowok tikar bantal gi atas padey, batas2 tali air. Doh lah nok start main woye, saroh tu gak, nya saroh tu gak sapa cemuh. Start main woye, acu hero nok bergocoh, stop sebentar, nya sambung saroh pulok. Cerito hok sejey lebih, campur nga saroh jadi 3 jey.
P.S. Hok mano pehey, pehey... Nok mano tak pehey buat-buat pehey! 😂
www.zukidin.com {Estd 2012}

---